مندرجہ بالا عنوان سے آپ یہ تو سمجھ ہی گئے ہوں گے۔کہ ہم اُن ارکان عشرہ کی بات کر رہے ہیں ۔ اصول سہ گانہ کے ضمن میں ہم نے جن کا مطالعہ کیا تھا۔
اور جن کی بنیاد ہی پر کسی بحر کی تشکیل ہوتی ہے۔کچھ یاد آیا کہ اصول سہ گانہ کیا ہوتے ہیں۔۔؟چلئے میں اُنہیں پھر دوہرا دیتا ہوں۔
۱۔سبب۔اس کی دو اقسام ہیں ۔۱۔سبب خفیف۔۲۔سبب ثقیل
۲۔وتد۔اس کی تین اقسام ہیں ۔۱۔وتد مجموع۔۲۔وتد مفروق۔۳۔وتد موقوف
۳۔فاصلہ۔اس کی دو اقسام تھیں۔
۱۔ فاصلہ ء صغریٰ ۔۔جو سبب ثقیل اور سبب خفیف کا مجموعہ ہے۔ یعنی جس میں پہلے تین حرف متحرک اور چوتھا ساکن ہوتا ہے۔
۲۔فاصلہ ء کبریٰ۔۔جو سبب ثقیل اور وتد مجموع کا مجموعہ ہے۔یعنی جس کے پہلے چار لفظ متحرک اور پانچواں ساکن ہوتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پھر اس کے بعد ہم نے یہ سیکھا تھا کہ یہ تینوں اصول جنہیں۔۔اصولِ سہ گانہ ۔کہا جاتا ہے۔عروض کی ریاضی کے مطابق
مختلف نمونے بنا کران اراکین کی تشکیل کرتے ہیں ۔جن سے بحور کی تشکیل ہوتی ہے۔اور وہ اراکین جنہیں ارکان عشرہ کہا جاتا ہے
مندرجہ ذیل ہیں۔
۱۔مفاعیلن۔۲۔فاعلاتن۔۳۔فاع لاتن۔۴۔مستفعلن۔۵۔مس تفع لن۔۶۔مفعولاتُ ۔۷۔مفاعلتن۔۸۔متفاعلن۔۹۔فعولن۔۱۰۔فاعلن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیسرے مرحلے میں ہم نے یہ دیکھا کہ بحر ۔ایک جیسے یا مختلف ارکان کی مخصوس تکرار سے بنتی ہے ۔اگر اُس کے ارکان یکساں ہوں ۔تو اسے
مفرد بحر کہتے ہیں اور اگر اس کے ارکان مختلف ہوں تو اُسے مرکب بحر کہتے ہیں ۔ اورہر بحر کا اپنا ایک مخصوص نام ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوتھے اور اب تک کے آخری مرحلے میں ہم نے یہ جانا کہ۔ زحاف۔ کسے کہتے ہیں ۔ہم نے یہ دیکھا کہ کسی بحر کے سالم رکن میں اگر کوئی تبدیلی
وقوع پذیر نہ ہو۔تو وہ بحر سالم بحر کہلاتی ہے ۔لیکن عام طور پر ہمارے اردو فارسی کے لسانی رویے کی وجہ سے ایسا ہوتا ہے کہ اکثر سبھی ارکانِ بحر یا کچھ
تبدیل ہو کر اپنی صورت بدل لیتے ہیں ۔اور جس ذریعے سے رکن اپنی صورت بدلتے ہیں ۔وہ زحاف۔کہلاتا ہے ۔اور جس رکن یا جزو میں یہ
تبدیلی ہوتی ہے اُسے مزاحف رکن کہا جاتا ہے ۔ان زحافات اور مزاحف ارکان کے کچھ مخصوص نام ہیں ۔جنہیں پڑھ کر بحر کی صورت کو بیان کیا جاتا
ہے۔یہاں اس بات کا ذکر کرنا دلچسپی سے خالی نہ ہو گا اور یہ بات یاد رکھنے والی ہے کہ مزاحف بحر کا نام ضرب کے ارکان طے کرتے ہیں ۔
پھر ہم نے زحافات کو لاگو کرنے کے سلسلے میں سب سے اہم بات یہ سیکھی کہ زحاف اگر کسی رکن یا جزو پر ایک مرتبہ عمل کریں تو مفرد زحاف کہلاتے ہیں
لیکن اگر یہ مختلف اراکین یا ایک ہی رکن کے مختلف اجزا پر عمل کریں تو انہیں مرکب زحاف کہا جاتا ہے ۔مرکب زحاف جب عمل کرتے ہیں تو یہ عمل یکے بعد دیگرے نہیں کرتے بلکہ ایک سے زیادہ جتنے زحاف بھی رکن ،ارکان یا اُن کے مختلف اجزا پر وارد ہوں وہ بیک وقت ہوتے ہیں ۔مزاحف اجزا
پر کوئی زحاف عمل نہیں کر سکتا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب ایک بات پیش نظر رکھئے کہ آگے سیکھنے کا مرحلہ اسی صورت میں آسان ہو گا ۔اگر ان چاروں مراحل کو آپ بخوبی طے کر چکے ہیں ۔اگر آپ نے ابھی تک
انہیں درست طریق پر ذہن نشین نہیں کیا ۔تو جب تک آپ اس مرحلے سے گزر نہ جائیں ۔یہ قسط اور آئیندہ کے اسباق آپ کو کوئی فائدہ نہیں دے سکیں گے۔
کیونکہ اب ہر قسط میں یکے بعد دیگرے میں ایک بحر لوں گا اور اُس کے زحافات کی جدول سے آپ کو آگاہ کروں گا ۔جس کا مطلب یہ ہے کہ آپ یہ جان سکیں کہ اُس بحر میں اُن کے علاوہ کوئی اور زحاف نہیں لگ سکتا۔اور اگر آپ انہیں سمجھ کر یاد کرنا یا اُن کا گوشوارہ تیار کرنا چاہیں تو آپ کو کسی مشکل کا سامنا نہ ہو۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔END OF THE PART ONE
