بحر متقارب(۱)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ابتدائی اسباق میں ہم نے عروض کے دس بنیادی اراکین میں ایک رکن۔۔فعولن ۔۔۔کے بارے میں سیکھا تھا۔جو ایک وتد مجموع اور ایک سبب خفیف پر مشتمل تھا۔بحر متقارب اسی رکن کی تکرار سے تشکیل ہوتی ہے۔
یہ ایک بہت ہی پر اسرار مگر دلچسپ بحر ہے۔۔اس میں ایک نڈھال شکستہ پا شخص کی چال بھی سنائی دیتی ہے اور ایک بگٹٹ دوڑتے ہوئے گھوڑے کی بھی ۔
وہ اس طرح کہ اگر اس رکن کے اجزا کو بہت آہستگی سے دوہرایا جائے تو یہ ایک تھکن اور شکستگی سے مملو جذبات و خیالات کی نشاندہی کرنے کے لئے بہت موزوں بحر ہے۔ذرا فعو۔لن ۔۔فعو۔۔۔لن۔ یا ۔۔۔ٹکا ٹک ۔۔ٹکا ٹک کی آہستگی سے تکرار کر کے دیکھئے تو ایسا محسوس ہوگا جیسے دل گرفتگی اپنی انتہا پر ہو اور مارے تھکن کے پاؤں اٹھانا بھی مشکل نظر آ رہا ہو۔۔پھر اسی کو تیز لہجے میں پڑھ کر دیکھئے۔تو کسی دوڑتے ہوئے سرمست گھوڑے کی ٹاپیں آپ کی سماعت میں گونجنے لگیں گی۔۔ان دونوں کیفیتوں کی امثال دیکھیں
شکستہ و نڈھال کیفیت۔۔۔قلق اور دل کا سوا ہو گیا
دلاسا تمہارا بلا ہو گیا(حالی)
سرپٹ و سرشار کیفیت۔۔اقبال کا ساقی نامہ
اٹھا ساقیا پردہ اس راز سے
لڑا دے ممولے کو شہباز سے
اس بحر کو مسدّس اور مثمن دونوں طرح استعمال کیا جاتا ہے۔مسدّس بحر میں ہر مصرع میں ۔۔فعولن یا اس کے محذوف رکن کو تین مرتبہ دوہرایا جاتا ہے جبکہ مثمن میں اسی ایک رکن کو چار مرتبہ۔۔
اسی طرح اس بحر میں ایک اور دلچسپ کھیل بھی کھیلا جاتا ہے۔جسے تسکین اوسط کا کھیل کہتے ہین ۔اسے جب ہم کھیلیں گے ۔تو اس کی باریکیوں پر بھی گفتگو کریں گے ۔فی الحال اتنا جان لیجئے کہ اس کے نتیجے میں بحر کے کئی آہنگ ہو جاتے ہیں ۔اور آہنگ تو آپ سمجھتے ہی ہیں کہ اُس صوتی ترتیب و توازن کو کہتے ہیں ۔جو ہمین کوئی شعر یا نظم پڑھتے ہوئے محسوس ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس بحر میں لگنے والے زحافوں کے باب میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس بحر کا بنیادی رکن ۔۔کیا ہے؟
فعولن
فعولن کتنے اجزا پر مشتمل ہے؟
دو اجزا پر۔۔۔(۱)وتد مجموع۔۔فعو۔۔(۲)سبب خفیف ۔۔لُن
اس کا مطلب یہ ہوا کہ اس بحر میں صرف وہی زحاف لگ سکتے ہیں جو وتد مجموع اور سببِ خفیف پر لگ سکتے ہوں۔ان کے علاوہ کوئی دوسرا زحاف نہین لگ سکتا۔
کیا آپ کو یاد ہے کہ وتد مجموع اور سبب خفیف پر لگنے والے زحاف کون سے ہیں ؟
اور اُن میں سے فعولن پر کن کا اطلاق ہو سکتا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لیجئے اُن کی جدول حاضر ہے۔
مجھے امید ہے کہ آپ کو یہ اصول تو یاد ہی ہوگا کہ اگر کہیں مرکب زحاف لگے گا تو سبھی زحاف بیک وقت عمل کریں گے ۔یکے بعد دیگر نہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۱۔ثلم۔۔فعو ۔۔کا سرِ وتد ۔ف۔ساقط ہوا۔۔باقی بچا ۔عولن۔۔اسے۔ فعلن ۔ بہ سکون ع سے بدل لیا۔محذوف ۔اثلم ۔۔کہلاتا ہے
۲۔ثرم۔۔یہ مرکب زحاف ہے ۔۔وتد پرزحاف ثلم اور سبب خفیف لُن پر زحاف قبض کا عمل ہوا تو باقی بچا۔عولُ۔جسے۔فعلُ۔۔بہ سکون ع سے بدل لیا۔
مزاحف کو اثرم کہتے ہیں ۔۔(ثرم اور ثلم میں ۔فرق نوٹ کریں)
۳۔بتر۔۔زحاف بتر سے مکمل وتد مجموع ساقط ہوا۔باقی بچا ۔۔لُن۔۔اسے ۔فع۔سے بدل لیا۔مزاحف کوابتر کہیں گے
۴۔ثلم و حذف۔کے عمل سے سرِوتد ف اورحذف سے سبب خفیف ۔لن۔ساقط ہوئے۔۔باقی بچا۔۔عُو۔۔جسے ۔فع۔۔سے بدل لیا۔اسے اثلم محذوف
کہتے ہیں۔
۵۔ثلم و قصر۔۔ثلم سے سرِ وتد کٹا اور قصر نے سببِ خفیف کے ۔۔لُن۔۔کے ن کو ساقط کر کے اس سے پہلے لام کی حرکت کو بھی ختم کر دیا۔باقی بچا۔عُول بہ تسکین لام ۔۔اسے ۔فاع۔۔سے بدل لیتے ہیں اور مزاحٖف۔۔اثلم مقصور ۔۔کہلاتا ہے
۶۔حذف و عرج ۔۔۔عرج سے وتد کا دوسرا متحرک حرف ساکن ہوا اور حذف سے سبب خفیف ۔لُن۔ساقط ہوا۔باقی فعو۔بہ تسکین ع بچا ۔جسے۔۔ فاع ۔۔سے بدل لیا۔محذوف کواعرج محذوف کہتے ہیں۔۔یہ فاع حاصل کرنے کا ایک اور طریق ہے۔
۷۔ثلم و تسبیغ۔۔خرم کے عمل سے جسے فعولن میں ثلم سے موسوم کیا جاتا ہے۔سروتد کٹا اور سبب خفیف کے دونوں حروف ۔لُن ۔کے متحرک اور ساکن کے
درمیان ایک ساکن الف کا اضافہ ہوا۔عُولان ۔حاصل ہوا۔جسے فعلان سے بدل لیا۔محذوف۔۔اثلم مسبّغ ۔۔کہلاتا ہے
۸۔تسبیغ۔۔فعولن کے سبب خفیف ۔۔لُن۔۔کے متحرک لام اور ساکن نون کے درمیان ایک ساکن الف کا اضافہ کر کے۔۔فعولان ۔۔حاصل کیا جاتا ہے
محذوف کو۔۔مسبّغ ۔۔کہتے ہیں
۹۔قبض۔۔فعولن میں پانچویں مقام یعنی سبب خفیف کا ساکن نون ساقط ہوا۔۔باقی ۔فعولُ۔۔بچا ،مزاحف۔مقبوض کہلائے گا
۱۰۔قصر۔۔سبب خفیف کا آخری حرف مع حرکت ماقبل ساقط ہوا۔تو باقی۔۔فعول۔۔سکون بہ لام بچا ۔مزاحف کو مقصور کہتے ہیں
۱۱۔حذف۔۔اس زحاف کے عمل سے رکن فعولن کاسبب خفیف ساقط ہوا ۔باقی ۔فعو۔۔بچا۔۔جسے ۔فعل بہ حرکت عین اور بہ سکون لام سے بدل لیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ رکن فعولن پر عمل کرنے والے گیارہ زحافوں کی نو صورتوں کی جدول ہے کیونکہ ۔فع اور فاع کو دو ،دوطریقوں سے حاصل کیا گیا ہے ۔اس لئے صورتیں صرف نو ہی ہیں ۔ ۔ ۔تفصیل آپ نے دیکھ لی اب ان کی صورتیں۔جنہین فروع کہا جاتا ہے ۔اُنہیں بھی ذہن نشین کر لیں۔
فعلن۔فعلُ۔فع۔فاع۔فعلان۔فعولان۔فعولُ۔فعول۔فعل
جمیل الرحمن
(باقی اگلے سبق میں )
