بحرِ متقارب(۲)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گذشتہ سبق میں ہم نے بحر متقارب کے بنیادی رکن۔۔فعولن۔۔پر لگنے والے زحاف اور اُس کے نتیجے میں بننے والی صورتوں کا مشاہدہ کیا۔اب ہم یہ جانتے ہیں کہ رکن۔فعولن۔پر صرف وہی زحاف وارد ہو سکتے ہیں ۔جو وتد مجموع اور سبب خفیف کے لئے مختص ہیں ۔یہاں ایک بات یاد رکھئے کہ اگر
کسی بحر کے کسی بھی رکن پر کوئی زحاف نہ لگا ہو تو اسے اُس کی اصل حالت میں ۔۔سالم بحر۔کہا جاتا ہے ۔جبکہ زحاف یا زحافوں کا اطلاق ہونے کے بعد وہ مزاحف بحر کہلاتی ہے ۔اور کتابی سطح پر اُس کے ہر رکن کو علی الترتیب بیان کیا جاتا ہے ۔تاکہ ایک ہی نگاہ میں یہ اندازہ ہو سکے کہ یہ بحر سالم استعمال کی گئی ہے یا مزاحف۔۔۔اور اگر مزاحف شکل میں ہے تو اس کے ارکان کی صورتیں کیا ہیں۔عمومی طور پر ہر مصرع میں تین اور پورے شعر میں چھ ارکان کی بحر کو مسدّس اور
اسی طرح آٹھ ارکان پر مشتمل بحر کو مثمن اور سولہ ارکان پر مشتمل بحر کو شانزہ دہ رکنی بحر کے نام سے موسوم کیا جاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آئیے۔۔اب ایک ایک کر کے ۔۔بحر متقارب (جسے بحر تقارب بھی کہتے ہیں )۔۔کی مختلف اشکال کا امثال و تقطیع کے ذریعہ تفصیلی جائزہ لیتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بحر متقارب۔۔مثمن سالم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فعولنxفعولنxفعولنxفعولن
اصل بحرمثمن۔۔آٹھ ارکان۔۔فعولن چار مرتبہ۔۔ہر مصرع میں
سالم۔۔۔کوئی زحاف استعمال نہیں ہوا،یعنی کسی رکن میں کوئی تبدیلی یا تغیّر نہیں ہوا
امثال۔۔۔۔۔۔۔۔۔۔۔۔۔۔۔۔۔۔۔۔۔اشعار
(۱) غزل اُس نے چھیڑی مجھے ساز دینا
ذرا عمرِ رفتہ کو آواز دینا(صفی لکھنوی)
تقطیع۔۔۔غ،زل،اُس /فعولن/ن،چے،ڑی/فعولن/م،جے،سا/فعولن/ز،دے،نا/فعولن
ذ،را،عم/فعولن/ر،رف،تا/فعولن/ک،آ،وا/فعولن/ز،دے،نا/فعولن
نکات تقطیع۔۔۔۔مصرع اوّل میں ۔نے۔کی ۔ی۔اور۔چھیڑی ۔کی دوچشمی ھ گر گئی اور ساز کی ز متحرک ہو گئی
مصرع ثانی میں ۔۔رفتہ کی ہائے مختفی کا اعلان اسے کھینچ کر پڑھنے سے الف کی شکل میں کیا گیا
کو۔۔کی واؤ گر گئی
نوٹ کیجئے۔۔(۱)کہ تقطیع کرتے ہوئے حروف علّت(ا،و ،ی) گرانے کی اجازت سے کام لیا گیا ہے
(۲) رفتہ۔۔کی ہ جسے ہائے مختفی کہا جاتا ہے ۔بقدر ضرورت اُسے الف سے بدل کر تقطیع میں محسوب بھی کیا جا تا ہے اور گرایا بھی جا سکتا ہے
(۳)دوچشمی ھ کبھی محسوب نہیں ہوتی(یعنی اُسے تقطیع میں کبھی شمار نہیں کیا جاتا)
(۴)آ۔۔کو پورا جزو شمار کیا گیا ہے
۔۔۔۔۔۔۔۔۔۔۔۔۔۔۔
(۲) شعر
ستاروں سے آگے جہاں اور بھی ہیں
ابھی عشق کے امتحاں اور بھی ہیں(اقبال)
تقطیع۔۔۔س،تا،رو/فعولن/س،آ،گے/فعولن/ج،ہا،او/فعولن/ر،بی،ہے/فعولن
ا،بی،عش/فعولن/ق،کے،ام/فعولن/ت،حا،او/فعولن/ر،بی،ہے/فعولن
نکات تقطیع۔۔۔۔ ستاروں ،جہاں ، ہیں اور امتحاں۔۔کی نون غنّہ گر گئی۔۔ اسی طرح ۔۔بھی۔۔کی دو چشمی ھ بھی گر گئی ۔
یاد رکھئے ن غنّہ کبھی تقطیع میں محسوب نہیں ہوتی۔
۔۔۔۔۔۔۔۔۔۔۔۔۔۔۔
(۳) شعر
سُنی تھی کسی سے جو بحرِ تقارب
اُسے کر لیا گھنگھرؤں کا تفنّن(انشا)
تقطیع۔۔۔۔س ، نی،تی/فعولن/ک،سی،سے/فعولن/ج،بح،رے/فعولن/ت،قا،رب/فعولن
ا ،سے،کر/فعولن/ل،یا،گگ/فعولن/ر ،وو،کا/فعولن/ت،فن،نن/فعولن
نکات تقطیع۔۔اس شعر کے نکات پر غور کر کے انہیں اپنی گرہ میں باندھ لیجئے
۱۔تھی ۔۔کی ھ گر گئی۔
۲۔۔جو کا حرف علت۔۔واؤ۔۔گر گیا۔۔بحر کی ۔ر۔۔کے نیچے زیر کا اشباع کر کے
(جب زیر،زبر اور پیش کو کھینچ کر پڑھتے ہیں تو اُسے اشباع کرنا کہا جاتا ہے)پڑھا گیا تو وہ ۔۔رے۔۔پڑھی گئی اور پورے
جزو کے طور پر محسوب ہوئی
۳۔۔لفظ ۔گھنگھرؤں ۔۔کی دو چشمی ھ اور ن غنّہ گر گئی۔۔جبکہ واؤ پر ہمزہ کی وجہ سے ایک کی بجائے ۲ واؤ محسوب ہوئے
۴۔تفنّن ۔۔کے لفظ میں چونکہ ن پر تشدید ہے ۔اس لئے وہ ۲نون محسوب ہوئے
نوٹ۔۔واؤ پر جب ہمزہ ہو یا کسی حرف پر تشدید تو وہ دو حرف شمار ہوتے ہین۔
شعر برائے مشق
رقیبوں سے میرا گلہ ہو رہا ہے
یہ کیا کر رہے ہو یہ کیا ہو رہا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔باقی آئیندہ سبق میں
