۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہم یہ دیکھ چکے ہیں کہ مفرد بحور ایک ہی جیسےپانچ حروف پر مشتمل خماسی رکن ۔جس میں دو اجزا ہوتے ہیں یا سات حروف پر مشتمل سباعی رکن ۔جس میں تین اجزا ہوتے ہیں ۔کی تکرار سے بنتی ہیں ۔اس سے پیشتر کہ اس سبق میں ہم مرکب بحور کے بارے میں گفتگو کریں ایک بات ذہن نشین کر لیں کہ ابھی تک ہم صرف بحور کے ڈھانچے پر گفتگو کر رہے ہیں ۔علم الابدان اور علم التعمیر کے طالب علم اس بات سے بخوبی واقف ہیں کہ سب سے پہلے ڈھانچے کو اچھی طرح سمجھا جاتا ہے اور جزئیات پر گفتگو بعد میں کی جاتی ہے ۔علم العروض کے ڈھانچے میں ۔۔تلفظ ،اصول سہ گانہ(سبب+وتد+فاصلہ)،جز ،رکن ،بحر ،بحور کی ریاضی اور زحاف۔۔۔۔۔۔۔کی اصلیت کو سمجھے بغیر ایک قدم بھی آگے نہیں بڑھا جا سکتا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرکب بحر کا نام ہی یہ سمجھنے کے لئے کافی ہونا چاہئے کہ اگر مفرد بحر ایک ہی قسم کے ارکان کی تکرار سے بنتی ہے تو مرکب بحر کے ارکان اور ان کی ریاضی مختلف ہو گی۔۔جس کا مطلب یہ ہے کہ مرکب بحر خماسی و سباعی دونوں اقسام کے ارکان پر مشتمل ہوتی ہے۔اور ان کے دائرے بھی وتد سے شروع ہو کر وتد پر ہی ختم ہوتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چلئے ۔۔۔دیکھتے ہیں کہ بحور مرکبہ کے ارکان اور ان کی ریاضی کیا ہے۔مگر اس سے پہلے ایک وضاحت بہت ضروری ہے۔ہم نے گزشتہ کسی سبق میں آپ کو بتایا تھا کہ ایک بحر میں عمومی طور پر آٹھ اور زیادہ سے زیادہ سولہ ارکان ہوتے ہیں ۔اس کی وجہ یہ ہے کہ جب بحور ایجاد ہوئین تو آج کی طرح آزاد نظم کا وجود نہیں تھا بلکہ دو مصرعوں یاشعر کی بنیاد پر ان کی تخلیق ہوئی تھی ۔لہٰذا جب ہم یہ کہتے ہیں کہ ایک شعرچار، چھ یا آٹھ ارکان پر مشتمل ہے تو اس کا مطلب یہ ہوتا ہےکہ ہر مصرع دو،تین یا چار ارکان پر مشتمل ہے۔یعنی علم العروض کی اصطلاح مین وہ مربع ،مسدس یا مثمن ہے ۔بعض اوقات اراکین کو دگنا بھی کر دیا جاتا ہے جس کے نتیجے میں اس بحر کو مضاعف بھی کہا جاتا ہے ۔مگر اس مر حلے پر آپ صرف یہ یاد رکھئے کہ مربع ،مسدس اور مثمن بحر کیا ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرکب بحور میں سب سے پہلے ہم ان بحور کو لیں گے ۔جو مسدس بحور ہیں یعنی جن کے ہر مصرع میں تین رکن ہیں ۔اور ان نو بحور کے دائرے کو مشتبہ کہا جاتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بحر کا نام اور اس کی ریاضی یعنی ارکان ۔ان کے اجزا اور ترتیب
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔سریع۔ مستفعلن+مستفعلن +مفعولاتُ
مستفعلن= سبب خفیف+سبب خفیف+وتد مجموع
مفعولاتُ=سبب خفیف +سبب خفیف +وتد مفروق
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
2۔جدید فاعلاتن+ فا علاتن +مس تفع لن
فاعلاتن=سبب خفیف+وتد مجموع+سبب خفیف
مس تفع لن=سبب خفیف +وتد مفروق +سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
3۔قریب مفاعیلن+مفاعیلن+فا ع لاتن
مفاعیلن= وتد مجموع+سبب خفیف +سبب خفیف
فاعلاتن= وتد مفروق+سبب خفیف + سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
4۔منسرح مستفعلن +مفعولاتُ+مستفعلن
مستفعلن=سبب خفیف+ سبب خفیف +وتد مجموع
مفعولاتُ =سبب خفیف +سبب خفیف +وتد مفروق
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
5۔خفیف فاعلاتن+مس تفع لن+فاعلاتن
فاعلاتن=سبب خفیف +وتد مجموع + سبب خفیف
مس تفع لن = سبب خفیف + وتد مفروق +سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
6۔مضارع مفاعیلن + فا ع لاتن + مفاعیلن
مفاعیلن=وتد مجموع+سبب خفیف +سبب خفیف
فاع لاتن= وتد مفروق +سبب خفیف + سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
7۔مقتضب مفعولاتُ+مستفعلن +مستفعلن
مفعولاتُ=سبب خفیف + سبب خفیف+وتد مفروق
مستفعلن=سبب خفیف +سبب خفیف + وتد مجموع
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
8۔مجتث مس تفع لن+فاعلاتن +فاعلاتن
مس تفع لن =سبب خفیف +وتد مفروق + سبب خفیف
فاعلاتن= سبب خفیف + وتد مجموع + سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
9۔مشاکل فاع لاتن +مفاعیلن + مفاعیلن
فاع لاتن= وتد مفروق +سبب خفیف +سبب خفیف
مفاعیلن= وتد مجموع +سبب خفیف +سبب خفیف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ نو بحور مرکبہ مسدس بحور ہین ۔جنہیں مثمن شکل میں بھی استعمال کیا جاتا ہے ۔مگر کون سی بحر اردو عروض میں کیوں استعمال نہیں ہوتی یا ہو سکتی اس کی وجہ بعد میں بتائی جائے گی. فی الحال یہ یا د رکھئے کہ اگر ان میں سے کسی بحر کو مثمن بنا کر یعنی ہر مصرع میں ایک رکن کا اضافہ کر کے استعمال کیا جائے گا تو اس کی ریاضی کیا ہو گی ۔اور وہ اس طرح ہے کہ اگر کسی مسدس بحر میں ارکان کی ترتیب یوں ہو۔
1۔الف الف ب
2۔الف ب الف
3۔الف ب ب
تو جب اسے مثمن بنائیں گے تو ارکان کی ترتیب یوں ہو جائے گی۔
الف ب الف ب
مگر یہ سب اس وقت بتایا جائے گا جب ہم ہر بحر اور اس کے زحافات کا مکمل مطالعہ اور تقطیع کے ذریعہ اس کی مشق کرین گے۔
